Körfuknattleiksfélagið Gosi
Körfuknattleiksfélagið Gosi síðar Körfuknattleiksfélag Reykjavíkur var reykvískt íþróttafélag sem stofnað var 25. desember 1951. Það var lagt niður árið 1970 þegar starfsemin rann inn í nýstofnaða körfuknattleiksdeild Vals.
Saga[breyta | breyta frumkóða]
Körfuknattleiksfélagið Gosi var stofnað af nokkrum nemendum í Menntaskólanum í Reykjavík. Líkt og nafnið gefur til kynna fylgdi takmörkuð alvara máli. Félagið fékk ekki formlega aðild að Íþróttabandalagi Reykjavíkur fyrst í stað og keppti því sem gestalið á fyrsta Íslandsmótinu í körfubolta sem fram fór á árinu 1952. Félagið vann til Íslandsmeistaratitla í yngri flokkum undir þessu heiti sínu næstu árin.[1] Guðmundur Georgsson var formaður félagsins flestöll fyrstu árin.
Í lok árs 1957 var ákveðið að breyta nafni félagsins í Körfuknattleiksfélag Reykjavíkur (KFR). Um leið var tilkynnt um ráðningu Evalds Mikson sem aðalþjálfara félagsins.[2] Undir hinu nýja heiti urðu liðsmenn Körfuknattleiksfélags Reykjavíkur tvívegis Reykjavíkurmeistarar, auk þess sem starf yngri flokka stóð í blóma. Í september 1970 yfirtók Körfuknattleiksdeild Vals alla starfsemi félagsins.
Tilvísanir[breyta | breyta frumkóða]
- ↑ Skafti Hallgrímsson (2001): 37.
- ↑ „Morgunblaðið 2. febrúar 1958“.
Heimildir[breyta | breyta frumkóða]
- Skafti Hallgrímsson. (2001). Leikni ofar líkamsburðum. Saga körfuknattleiks á Íslandi í hálfa öld. Reykjavík: KKÍ.